ဂျီ ၈ ခေါင်းဆောင်များက ဒေါ်စုကို လွှတ်ပေးရန် တောင်းဆို

နယူးဒေလီ။ ။ ယခု ဂျပန်နိုင်ငံတွင် ကျင်းပနေသည့် စက်မှုထိပ်သီး ၈ နိုင်ငံ အစည်းအဝေး တက်ရောက်လျက် ရှိကြသော ခေါင်းဆောင်များက နိုင်ငံရေး အကျဉ်းသားအားလုံး လွှတ်ပေးပြီး ဒီမိုကရေစီစနစ်သို့ ရှေးရှုသည့် နိုင်ငံရေး အသွင်ကူးပြောင်းမှုတရပ် ပြုလုပ်ပါရန် မြန်မာစစ်အစိုးရကို အင်္ဂါနေ့က တောင်းဆိုလိုက်သည်။

ဗြိတိန်၊ ကနေဒါ၊ ပြင်သစ်၊ ဂျာမဏီ၊ အီတလီ၊ ဂျပန်၊ ရုရှ နှင့် အမေရိကန်နိုင်ငံတို့ ပါဝင်သော စက်မှု ၈ နိုင်ငံ အစည်းအဝေးက ကြေညာချက်တရပ် ထုတ်ပြန်ပြီး “ဒေါ်အောင်ဆန်းစုကြည် အပါအဝင် နိုင်ငံရေး အကျဉ်းသား အားလုံးကို ချက်ချင်း လွှတ်ပေး၍ တရားဝင်မှုရှိပြီး ဒီမိုကရေစီ နည်းကျသည့် အရပ်သား အစိုးရ တရပ်သို့ အသွင်ကူးပြောင်းရေးကို အားပေးပါရန်” မြန်မာစစ်အစိုးရကို တောင်းဆိုလိုက်ကြသည်။

နိုင်ငံတကာ၏ တောင်းဆို ဖိအားပေးမှုများကို မသိကျိုးကျွန်ပြု၍ ဒေါ်အောင်ဆန်းစုကြည်၏ အကျယ်ချုပ် သက်တမ်းကို မေလအတွင်းက နောက်ထပ်သက်တမ်း ၁ နှစ် ထပ်မံ တိုးမြှင့်ခဲ့သည်။


ဒေါ်အောင်ဆန်းစုကြည်သည် လွန်ခဲ့သော ၁၈ နှစ်အတွင်း ၁၂ ကျော်ကြာမျှ သူမ၏ ရန်ကုန်မြို့ အင်းယားကန် နံဘေး နေအိမ်တွင် တဦးတည်း အကျယ်ချုပ် ကျခံနေခဲ့ရသည်။

ဂျီ ၈ ဟု အတိုကောက် ခေါ်ဝေါ်ကြသည့် စက်မှုထိပ်သီး ၈ နိုင်ငံ၏ ခေါင်းဆောင်များ ထုတ်ပြန်လိုက်သော ကြေညာချက်တွင် မြန်မာနိုင်ငံ ရန်ကုန်တိုင်းနှင့် ဧရာဝတီတိုင်းတို့ကို မေလ ၂ ရက်နှင့် ၃ ရက်နေ့များက တိုက်ခတ် ဖျက်ဆီးသွားခဲ့သောကြောင့် ကျန်ရစ်ခဲ့သည့် နာဂစ် ဆိုင်ကလုံးမုန်တိုင်း ဒုက္ခသည်များထံ နိုင်ငံခြားသား အကူအညီပေးရေး လုပ်သားများ လွတ်လပ်စွာ သွားရောက်ကူညီ ခွင့်ပြုရန်လည်း တောင်းဆိုထားသည်။ ထိုမုန်တိုင်းကြောင့် လူပေါင်း ၁၃၈ဝဝဝ ကျော်သေဆုံး ပျောက်ဆုံးခဲ့ရသည်။

စက်မှုထိပ်သီး ၈ နိုင်ငံခေါင်းဆောင်များက “မိမိတို့သည် နာဂစ်ဆိုင်ကလုံး မုန်တိုင်းဒဏ် ခံခဲ့ရသည့် ဒုက္ခသည်များထံ အကူအညီများ အမှန်တကယ် ရောက်ရှိရေးအတွက် သံန္နိဌာန် ချမှတ်ထားကြောင်း၊ နိုင်ငံခြားသား အကူအညီပေးရေး လုပ်သားများအပေါ် ချမှတ်ထားသည့် ကျန်ရှိနေသေးသော အကန့်အသတ် အားလုံးကို ရုပ်သိမ်းပေးရန်လည်း မြန်မာ အာဏာပိုင်များကို တောင်းဆိုကြောင်း” အဆိုပါ ကြေညာချက်တွင် ဖေါ်ပြထားသည်။

သို့သော် မြန်မာနိုင်ငံ အစိုးရကမူ ဆိုင်ကလုံး ဒုက္ခသည်များကို လူသားချင်းစာနာသည့် အကူအညီများ ပေးအပ်ရန် နိုင်ငံခြားသား အကူအညီပေးရေး ကျွမ်းကျင်သူ ၁၅ဝဝ ကျော်ကို ဗီဇာများ ထုတ်ပေးခဲ့ပြီး ဖြစ်ကြောင်း အင်္ဂါနေ့က ထုတ်ဖေါ် ပြောဆိုသွားပါသည်။
09-07-2008
ကုလသမဂ္ဂ လူသားချင်း စာနာသည့် အကူအညီပေးရေး ညှိနှိုင်းရေးရုံး (UNOCHA) ၏ အဆိုအရ ဇူလိုင်လ (၇) ရက်နေ့ အထိ ကုလသမဂ္ဂဝန်ထမ်း (၃၁၇) ဦးသာဗီဇာ ရရှိသေးကြောင်း၊ ဗီဇာလျှောက်ထားမှု ၁၃ ခုမှာ စောင့်ဆိုင်းနေဆဲ ဖြစ်ကြောင်း သိရပါသည်။

“ယခုအခါ သုံးပွင့်ဆိုင် ပင်မအုပ်စု (TCG) သို့ တင်ပြလျှင် ဗီဇာ လျှောက်လွှာများကို ၂ ရက်၊ ၃ ရက်အတွင်း ထုတ်ပေးလျက် ရှိပါသည်။ ဗီဇာအများစုကို ကနဦး ရက်သတ္တ ၂ ပတ် ခွင့်ပြုချက်ဖြင့် တကြိမ်သာ ဝင်ရောက်ခွင့် ဗီဇာများအဖြစ် ထုတ်ပေးထားပါသည်” ဟု (UNOCHA) အဖွဲ့၏ အင်္ဂါနေ့က ထုတ်ပြန်ခဲ့သော “အခြေအနေ သုံးသပ်ချက်” အစီရင်ခံစာတွင် ရေးသား ဖေါ်ပြထားပါသည်။

ဆိုင်ကလုံး မုန်တိုင်းဒဏ်ခံ ဒေသများသို့ သွားရောက်ခွင့်ကို မြန်မာနိုင်ငံ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာ ချထားရေး ဝန်ကြီးဌာနသို့ တင်ပြ တောင်းခံရပြီး လျှောက်လွှာများ စိစစ်ခြင်းသည် ပျှမ်းမျှ ၄ ရက်မှ ၅ ရက်အထိ ကြာသည်ဟု သိရသည်။