မိုဘိုင်းဖုန်း စစ်ဆင်ရေး မောင်တောတွင် ပြုလုပ်

20-08-2008

မောင်အေး(နိရဉ္စရာ) ရခိုင်ပြည်နယ် အနောက်ဘက် နယ်စပ် မောင်တောမြို့တွင် ဘင်္ဂလာဒေခ်ျ့ နိုင်ငံသုံး လက်ကိုင် မိုဘိုင်းဖုန်း ကိုင်ဆောင်သူများ ရှိမရှိကို ဒေသအာဏာပိုင်များက ညဥ့်အချိန်တွင် ၀င်ရောက် စစ်ဆေးနေကြောင်း သတင်း ရရှိသည်။

အဆိုပါ စစ်ဆေးမှုကို မောင်တောမြို့နယ် မြောက်ပိုင်း ကျေးရွာများ ဖြစ်သည့် ဖက်ဝန်းချောင်း၊ ငန်းချောင်း ၊ မျောတောင် ကျေးရွာနှင့် တခြားကျေးရွာများတွင် ပြုလုပ်နေခြင်း ဖြစ်သည်။

မိုဘိုင်ဖုန်း ဖမ်းဆီးရေး စစ်ဆင်ရေးကို ငခူရ ကျေးရွာတွင် အခြေစိုက်သည့် အမှတ် ၅ နစက နယ်မြေ စခန်းမှ ဗိုလ်အောင်ကျော်ခင်မှ ဦးစီးပြီး ပြုလုပ်နေခြင်း ဖြစ်သည်ဟု ဒေသခံများ ပေးပို့သော သတင်းတွင် ဖေါ်ပြသည်။

ဒေသခံ တဦးက “သူတို့ က ညနေ လူသူ မကွဲတဲ့ အချိန်မှာ ရွာထဲကိုဝင်လာပြီး အိမ်တိုင်းကို တက်ပြီးဝင်ရောက် မွှေနှောက် ရှာဖွေပါတယ် ။ မသင်္ကာစရာ လူတွေကို တွေ့ရင် ဘင်္ဂလာနိုင်ငံက ဖုန်းတွေ့တယ် ဆိုပြီး ဖမ်းသွားတယ်။ ငွေပေးရင် ပြန်လွတ်ပေးတယ်။ ငွေမပေးရင် ချုပ်ထားတယ်။ သူတို့ဖမ်းရင် အနည်းဆုံးတယောက်ကို တသောင်း အထက်ကို ပေးမှ ပြန်လွတ်ပေးတယ်။ အမျိုးသမီးတွေကို ဆိုရင်လည်း ကိုယ်ထိလက်ရောက် ခန္ဓာကိုယ် အတွင်း စမ်းတာနှိုက်တာတွေ လုပ်တယ်။ အမျိုးသမီးတွေအော်ရင် ရိုက်တယ်။”ဟု ပြောသည်။

ယခုကဲ့သို့ ဘင်္ဂလာ မိုဘိုင်းဖုန်းများကို နယ်စပ်ကျေးရွားများတွင် စစ်ဆင်ရေး ပြုပ်လုပ်ပြီး လိုက်ရှာ နေခြင်းမှာ အာဏာပိုင်များ၏ လူ့အခွင့်အရေး ချိုးဖောက်မှုနှင့် မတရားအနိုင် ကျင့်များမှုကို ပြည်ပ အခြေစိုက် သတင်းဌာနများကို ဒေသခံများက တိုင်တန်းသည်ဟု ယူဆပြီး လိုက်ရှာနေခြင်းဖြစ်သည်ဟု သူက ပြောသည်။

ရခိုင်ပြည်နယ် မောင်တောနှင့် ဘူးသီးတောင် မြို့နယ်တွင် မြန်မာနိုင်ငံအစိုးရမှ ကမ္ဘာ့ နိုင်ငံများတွင် တွင်ကျယ်စွာ အသုံးပြုနေသည့် ဆက်သွယ်ရေး မိုဘိုင်း တယ်လီဖုံးများကို ယခုအချိန်ထိ ထုတ်ပေးခြင်း မရှိသဖြင့် ဘင်္ဂလာဒေ့ခ်ျနိုင်ငံအတွင်း အသုံးပြုရန် ထုတ်ပေး ထားသော မိုဘိုင်းဖုန်းများကို တရား မ၀င် ၀ယ်ယူပြီး အသုံးပြုနေကြသည်။

ကိုယ်ကိုတိုင်ကလည်း ပြည်သူတွေ အသုံးပြုဖို့ လိုလားနေသော မိုဘိုင်း တယ်လီဖုန်းတွေကို မထုတ်ပေးနိုင်၊ တဘက်နိုင်ငံက ဖုန်းများကို ၀ယ်ယူပြီး သုံးစွဲသူများကို လိုက်ဖမ်းနေသဖြင့် အများစု ပြည်သူများမှာ နအဖ အာဏာပိုင်များ၏ လုပ်ရပ်အပေါ် နားမလည် နိုင်ဘဲ ဖြစ်နေ ကြောင်း သတင်းများ ရရှိသည်။