ဇင်ဘာဘွေမှာ သာတဲ့လ

15-08-2008

တနေ့သော နေ့လယ်ခင်းသ၌ တရားစာအုပ်များကိုပြန်ဖတ်နေချိန်တွင် ကျွန်တော်၏အိမ်သို့ ကိုနန္ဒ တယောက် ပေါက်ချလာလေသည်။ သူလာလျှင်တော်တော်နှင့်မပြန်ပဲ တောရောက်တောင်ရောက် စကားပြောနေတတ်ရာ ကိုယ်လည်း အဖော်ရသဖြင့် ပျော်ရပေသည်။ သူကရောက်ရောက်ခြင်းပင် …

' ဘာတွေဖတ်နေတာလဲဗျ ' ဟု မေးလေသည်။

စားပွဲပေါ်ရှိ ဆရာတော် ဦးဇောတိက နှင့် အရှင်ဆန္ဒာဓိက ၏စာအုပ်များကိုတွေ့လို့မေးလိုက်ပုံရှိသည်။

ကျွန်တော် ။ ။ ဘာရယ်မဟုတ်ပါဖူးဗျာ လူ့ဘဝရလာတာ ဘာလို့ ဒုက္ခသုက္ခတွေနဲ့ လာရင်ဆိုင်နေရတာလဲ … ဘာလို့ တခြားနိုင်ငံမှာ လူလာမဖြစ်ဘဲ မြန်မာပြည်မှာ လူလာဖြစ်ရသလဲ ဆိုတာတွေ တွေးနေရင်း စာအုပ်တွေ ပြန်ရှာရင်းက ဒီစာအုပ်တွေ ထုတ်လာတာပါ။

ကိုနန္ဒ ။ ။ ဒါဆို ကိုယ့်လူက လူဖြစ်လာရတာကို ဒုက္ခလို့ ပြောချင်တာပေါ့။

ကျွန်တော် ။ ။ ဒီသဘောလည်း ပါတာပေါ့။

ကိုနန္ဒ ။ ။ ဒါဆိုရင် ဒီသတင်းလေးကို ဖတ်ကြည့်လိုက်ပါဦး …

သူက ပြောပြောဆိုဆိုပင် သူ့လက်ထဲကိုင်လာသော ဂျာနယ်တစောင်ကို ကျွန်တော့်လက်ထဲ ထိုးထည့်ပေးလိုက်သည်။ သူပြသော စာမျက်နှာကို လှန်ပြီး ဖတ်ကြည့်လိုက်သည်။ ကျွန်တော်ဖတ်နေစဉ် သူက ဇနီးသည် လာချပေးသော ကော်ဖီခွက်ကို ကောက် သောက်နေလေသည်။ အတန်ကြာအောင် ဖတ်ပြီးသွားသောအခါ ကျွန်တော်ပြုံးမိရလေသည်။

သူက -

ကိုနန္ဒ ။ ။ တွေ့တယ်မဟုတ်လား ။နေတတ်ရင် နေပျော်ပါတယ်ဗျ။ ဟဲ ဟဲ ဟဲ

သူပြောတာကို ကျွန်တော် သဘောကျပြီး တပြုံးပြုံး လုပ်နေမိလေသည်။


မော်ဒန်ဂျာနယ်ထဲတွင် ဆောင်းပါးရှင် “သင်းပပ” ရေးထားသည်မှာ...

ယခုအခါ ဇင်ဘာဘွေနိုင်ငံတွင် လူတွေမှာ တနေ့ ထမင်းတနပ် ဝယ်စားဖို့ မတတ်နိုင်လောက်အောင် ထိန်းမနိုင် သိမ်းမနိုင် ဖြစ်လာနေတဲ့ ငွေကြေးဖောင်းပွမှု နှုန်းထားကြောင့်ပါပဲ။

လက်ရှိနိုင်ငံရေး အနေအထားကြောင့် စီးပွားရေးကျဆင်းမှုကြောင့် စားနပ်ရိက္ခာနဲ့ အခြေခံလူသုံးကုန် ပစ္စည်းတွေ ရှားပါးပြတ်လပ်လာတယ်။ လူတွေ ငွေပေးချေရာမှာ နောက်က သုညတွေ အများကြီး ဖြစ်လာတယ်။

တရားဝင် ငွေကြေးဖောင်းပွမှုနှုန်းထားကို အစိုးရက ဖေဖော်ဝါရီလတွင် တရားဝင်ထုတ်ပြန်ထားရာ ၁၆၅,ဝဝဝ ရာခိုင်နှုန်းဖြစ်တယ်။ ဒါပေမဲ့ လွတ်လပ်တဲ့ သတင်းအဖွဲ့တွေက ပြောတာကတော့ ရာခိုင်နှုန်း လေးသန်း နီးပါး ရှိမယ်လို့ ခန့်မှန်းတယ်။

နေ့စဉ် ငွေပေးငွေယူ လုပ်ကြတဲ့ နေရာမှာ ငြီးငွေ့စရာကောင်းလောက်အောင် “ကွာဒရီလီယံ” အထိခေါ်ဝေါ်သုံးစွဲနေသော နိုင်ငံဆိုလို့ ဇင်ဘာဘွေနိုင်ငံဟာ ကမ္ဘာမှာ တခုတည်းသော နိုင်ငံဖြစ်တယ်။ တစ် ကွာဒရီလီယံ ဟာ တစ် နောက်မှာ သုည ၁၅ လုံး လိုက်ရတာကို ခေါ်တာဖြစ်တယ်။

၁ ဝဝဝ, ဝဝဝ, ဝဝဝ, ဝဝဝ, ဝဝဝပေါ့။

ဈေးဝယ်တဲ့အခါ သုညတွေကြောင့် ကွန်ပြူတာတောင် မနိုင်တော့သော အခြေအနေဖြစ်နေ။ ဘဏ်မှာ တရားဝင်ငွေလဲရင် ဇင်ဘာဘွေဒေါ်လာနဲ့ အမေရိကန်ဒေါ်လာလဲရင် ၁ဝ ဘီလျံနှုန်းထက် အများကြီးကျော်တယ်။ မှောင်ခိုဈေးမှာတော့ အမေရိကန် တစ်ဒေါ်လာကို ဇင်ဘာဘွေ ဒေါ်လာ ၂ဝ ဘီလျံ ကျော် သွားတယ်။

စတိုးဆိုင်တွေမှာ ပေါင်မုန့် လုံးဝ ပျောက်သွားတယ်။ စူပါမားကက်မှာ အလတ်စား ပေါင်မုန့်တလုံး ကို ဇင်ဘာဘွေ ဒေါ်လာ ၂ ဘီလျံ ၊ နွားနို့တပိုင့် ဇင်ဘာဘွေဒေါ်လာ ၃ ဘီလျံ၊ ကြက်ဥ အလုံး ၃ဝ ပါ တ ကဒ် ဇင်ဘာဘွေဒေါ်လာ ၄၅ ဘီလျံ ( အမေရိကန် ဒေါ်လာ ၄.၅ ။ တလုံး = ဝ.၁၅ ဒေါ်လာ= မြန်မာငွေ ၁၇၈.၅ကျပ်) ၊ ၁၇ အောင်စခွဲ မာဂျရင်း တဗူး - ဇင်ဘာဘွေဒေါ်လာ ၂၅ ဘီလျံ ၊ ကွက်ကီးမုန့် ၁ဝ ခုပါ တထုပ် ဇင်ဘာဘွေဒေါ်လာ ၁၉ဘီလျံ၊ အညံ့စား အမဲသား ၂ပေါင် ၄၅ဘီလျံ၊ ကားဘက်ထရီ တစ်လုံး ဇင်ဘာဘွေဒေါ်လာ ၂.၄ ထရီလျံ ၊ ။

နေ့စဉ် ဘဏ်က ငွေထုတ်လာတဲ့ လူတွေဟာ အုပ်ခဲ အရွယ် ငွေစက္ကူထုပ်တွေ လက်တွန်းလှည်းပေါ်တင်လာတဲ့ မြင်ကွင်းက ရိုးနေပြီ။

ကျွန်တော်က ကြားဖူး ဖတ်ဖူးထားတာတွေကို ဆက်ဖြည့်ပြောပြလိုက်သည်။

ကျွန်တော် ။ ။ဒါတောင် ဇင်ဘာဘွေနိုင်ငံက ၁၉၈ဝ ခုနှစ်ကမှ အင်္ဂလိပ်လက်ကနေ လွတ်လပ်ရေး ရခဲ့တာ။ အခုလက်ရှိ သမ္မတ မူကာဘီ ဟာ လွတ်လပ်ရေးကို တိုက်ယူခဲ့တာပေါ့ ။ သူနဲ့ အတူ အခု လက်ရှိ ဗိုလ်ချုပ်ကြီး ၅ယောက်ဟာ တရုတ်ပြည် နန်ကင်း စစ်တက္ကသိုလ်မှာ တက်ရောက် ခဲ့ကြတယ်။

၈ဝ% လူ ၁ဝ ယောက်မှာ ၈ယောက်က အလုပ်လက်မဲ့ ဖြစ်နေတယ်။ ကုဋေကြွယ်နိုင်ငံကနေ ကမ္ဘာ့အဆင်းရဲဆုံးနိုင်ငံ ဖြစ်သွားခဲ့တယ်။ လွန်ခဲ့တဲ့ ၂၅နှစ်က အာဖရိကရဲ့ စပါးကျီလို့ခေါ်တယ်။ အခု အသက် ၈၄ နှစ် ရှိပြီဖြစ်တဲ့ သမ္မတ မူကာဘီ တက်ခါစက လွန်ခဲ့တဲ့ ၂၈ နှစ်က အမေရိကန်၁ ဒေါ်လာ= ၇ ဇင်ဘာဘွေ ဒေါ်လာဖြစ်တယ်တဲ့။

လျှပ်စစ်က တရက်ကို ၄ နာရီပဲ ရတယ်။

လူတွေ အလုပ်သွားဖို့ ဘတ်စ်ကားခ မတတ်နိုင်လို့ အလုပ်ကို ခြေလျင် လမ်းလျှောက်သွားကြတယ်တဲ့ ။ ဒါကိုတော့ အစိုးရက မဖမ်းဘူး၊ အရေးမယူဘူး တဲ့။ ဇင်ဘာဘွေနိုင်ငံသားတွေဟာ ငွေတွေ အများကြီး ကိုင်နေရလို့ ကုဋေကြွယ် ဆင်းရဲသားတွေလို့ ခေါ်တယ်။

လူ ၅ ယောက်မှာ ၄ ယောက်က ဝင်ငွေ မရှိဖူး။

လူဦးရေ ၃ သန်း က ငတ်နေတယ်။

၁ဝ သန်းက အေအိုင်ဒီအက်စ် ဖြစ်နေတယ်။

မူကာဘီ ၇၁ နှစ်မှာ ယူထားတဲ့ သမ္မတ ကတော် ၄၃ နှစ်က ပြင်သစ် ပါရီမှာ ဈေးတခါ အဝယ် ထွက်ရင် အမေရိကန် ဒေါ်လာ သန်းချီ သုံးသတဲ့။ တိုင်းပြည်ကလူတွေမှာ ငတ်နေတယ်။

ကိုနန္ဒ ။ ။တော်ပါတော့ တော်ပါတော့ဗျာ ။ကြားရတာ စိတ်ဆင်းရဲစရာတွေပါဗျာ။

ကျွန်တော် ။ ။ ကျန်သေးတယ်ဗျ။ ဇင်ဘာဘွေနိုင်ငံရဲ့ အဓိက ဇာတ်လိုက် အကြောင်း ။

ကိုနန္ဒ ။ ။ တော်လောက်ပါပြီ ။ ကိုယ့်လူပဲ အခုနက တရားစာအုပ်တွေ ဖတ်နေတယ်ဆို။ ကျွန်တော် ပြောပြမယ်။ ဆရာတော် ဦးဇောတိကလား အရှင်ဆန္ဒာဓိကလား မသိတော့ဘူးဗျ ။ပြောတာ ဖတ်ဖူးတယ်။ ကိုယ်စိတ်ချမ်းသာချင်ရင် ကိုယ့်အောက်က လူတွေနဲ့ နှိုင်းပြီး တွေးရတယ် တဲ့ ဗျ။

စဉ်းစားကြည့်ဗျာ … ကျွန်တော်တို့ နိုင်ငံမှာ အခု ဆန် တပြည် ၁၅ဝဝကျပ်၊ ကြက်ဥတလုံး ၂ဝဝ ကျပ်၊ အင်းစိန်ကနေ ရန်ကုန်မြို့ထဲ ဘစ်ကားခ ၅ဝဝ ကျပ်ဗျာ။ ဝက်သား တပိသာ ၈ဝဝဝ ၊ ပဲဆီ တပိသာ ၄၈ဝဝ၊ ကြက်သား တပိသာ ၉ဝဝဝ ဗျာ။

ဘယ်လောက် သက်သာလဲ … ဇင်ဘာဘွေနဲ့ ယှဉ်ကြည့်လိုက်စမ်းပါ။

ကျွန်တော်တို့ နိုင်ငံက အပုံကြီး သာပါသေးတယ်။

ပေါင်မုန့်တလုံး ၆ဝဝ၊ အနည်းဆုံးဗျာ ကန်ဇွန်းရွက် တစည်း ၁၅ဝ ဗျာ။ ကြော်စားဗျာ။ ဗီတာမင်တွေ အပြည့် ပါတယ်။ ဘာလိုသေးလဲ ဗျာ။ တရားသဘောလေးနဲ့ နေလိုက်စမ်းပါ။ ကျွန်တော်တို့က ဇင်ဘာဘွေလောက် မဆိုးသေးပါဖူးဗျ။

ကျွန်တော်လည်း စောစောက ရင်ထဲ လိပ်ခဲတည်းလည်း ကြပ်တည်းတည်းဖြစ်နေသော ရင်ထဲက အလုံးကြီး လျောကနဲ ကျသွားပြီး

ကျွန်တော် ။ ။ အေးဗျာ အခုမှ နေသာသွားတယ်။ ဟုတ်တယ်ဗျ ။ အခုမှ ခပ်တည်တည် ဖြစ်သွားတော့တယ်။

ကော်ဖီခွက်ပေါ်တွင် နားနေကြသော ယင်တအုပ်သည် ကျွန်တော့်အသံကြောင့် လန့် ထပျံ ပြေးကြလေသည်။

MoeMaKha