မိုးဆက်တိုက်ရွာသောကြောင့် မိုးကုတ်တွင်တောင်ပြို၊ လူ ၆ ဦးသေဆုံး။ ပဲခူးနှင့် ဧရာဝတီမြစ်ရေလျှံ

အေးချမ်းမြေ့ | သြဂုတ် ၁၈၊ ၂၀၀၈
မြန်မာပြည်အနှံ့ မိုးဆက်တိုက် သည်းထန်စွာ ရွာသွန်းမှုကြောင့် မိုးကုတ်မြို့နယ်အတွင်း တောင်ပြိုကာ ကလေးတဦး အပါ အဝင် လူ ၆ ဦး သေဆုံးသွားရပြီး ပဲခူးတိုင်း၊ ဧရာဝတီတိုင်းတို့တွင် မြစ်ရေလျှံသဖြင့် ရေဘေးဒုက္ခသည် ထောင်ချီ ရှိနေ ကြောင်း ဒေသခံများထံမှ ကြားသိရသည်။
သြဂုတ်လ ၁၆ ရက်နေ့က မိုးသည်းထန်စွာရွာသွန်းပြီး တောင်များ ပြိုဆင်းခဲ့ရာ မိုးကုတ်မြို့နှင့် ၅ မိုင်ခန့် အကွာရှိ ဘော်ဘဒ ရွာတွင် လူနေအိမ်များ ပျက်စီးသွား၍ ထိုအိမ်တချို့တွင် နေထိုင်ကြသူများ သေဆုံး ခဲ့ရသည်ဟု မိုးကုတ် ဒေသခံ ကိုလှဦးက ပြောသည်။
ဘော်ဘဒရွာသည် အိမ်ခြေ ၁၅၀ နှင့် ၂၀၀ ကြားတွင် ရှိသော ရွာကြီးတရွာဖြစ်သည် ဟုသိရသည်။
ထိုဒေသတွင် ၃ လဆက်တိုက် မိုးရွာနေခဲ့ရာ ယခုထိလည်း ဆက်လက် ရွာသွန်းဆဲဖြစ်ကြောင်း ကိုလှဦးက ဆက်ပြောသည်။
“မိုးက ဖွဲဖွဲ ဖွဲဖွဲနဲ့ လုံးဝမတိတ်ဘဲ ရွာနေတာ ကြာပြီ။ ခုပြိုကျတဲ့တောင်ကတော့ ဒေသအခေါ် ကျောက်ပုပ်လို့ ခေါ်တဲ့ မြေတောင်အမျိုးအစားပေါ့။ ပြိုကျဖို့ လွယ်တယ်” ဟု ၎င်းက ဆက်ပြောသည်။ တောင်ပြိုသဖြင့် ယောက်ျား ၃ ဦး၊ မိန်းမ ၂ ဦးနှင့် ၉ နှစ်အရွယ် ကလေး ၁ ဦးတို့ သေဆုံးသွားရကြောင်း ကိုလှဦးက ပြောသည်။

ဇွန်လအတွင်းကလည်း မိုးကုတ်မြို့တွင် တောင်ပြိုပြီး ရေလွှမ်းခဲ့သဖြင့် လူ ၁၁ ဦး သေဆုံးခဲ့သေးသည်။

ပဲခူးတိုင်းအတွင်းတွင်လည်း သြဂုတ်လဆန်းကစ၍ မိုးသည်းထန်စွာရွာသွန်းခဲ့ရာ ယခင် အပတ်က စစ်တောင်း မြစ်ရေလျှံ သဖြင့် ကျေးရွာတချို့ ရေလွှမ်းမိုးပြီး လူ ၃၀၀၀ ကျော် ဒုက္ခသည်များ အဖြစ် အိမ်ခြေရာမဲ့ ဖြစ်သွားခဲ့ရသည်ဟု ဒေသခံ များက ပြောသည်။

မိုးသည်းထန်စွာ ရွာသွန်းမှုကြောင့် စပါးစိုက်ခင်း ဧက ထောင်ပေါင်းများစွာ ပျက်စီးဆုံးရှုံး ခဲ့ရပြီး တချို့စိုက်ခင်းများမှာ ရေလွှမ်းဆဲ ရှိနေသေးကြောင်း ဒေသခံများက ပြောသည်။ ရေလွှမ်းခံရသည့် ဒေသများတွင် ပြွန်တန်ဆာ၊ ရွှေကျင်နှင့် မဒေါက်မြို့နယ်တို့ ပါဝင်သည်။

ရေလွှမ်းမိုးခြင်းခံခဲ့ရသည့် ဒုက္ခသည်များအတွက် ပဲခူးမြို့ဒေသခံ အာဏာပိုင်များက စာသင်ကျောင်းများနှင့် ဘုန်းတော်ကြီး ကျောင်း များတွင် ယာယီဒုက္ခသည်စခန်းများ ဖွင့်ထားပေးသည်ဟု ပဲခူးမြို့ခံ တဦး ဖြစ်သူ မပဲပဲက ပြောပြသည်။

“သံဃာတော်တွေ အပါအဝင် အလှူရှင်တွေနဲ့ ဒေသခံအာဏာပိုင်တွေက လောလော ဆယ် ဒုက္ခသည်တွေ စားဖို့ လှူဒါန်း ပေးနေပါတယ်” ဟု ၎င်းကဆက်ပြောသည်။

ယခုအခါ မိုးရွာသွန်းမှု လျော့နည်းလာပြီး ရေပြန်ကျနေပြီဖြစ်သောကြောင့် တချို့သော ဒုက္ခသည်များမှာ နေအိမ်များသို့ ပြန်လည် ပြောင်းရွှေ့နေကြပြီဖြစ်ကြောင်း မပဲပဲက ပြောပြသည်။

ပြွန်တန်ဆာ၊ မဒေါက်နှင့် ရွှေကျင်မြို့များတွင်မူ ယခုထက်တိုင် ရေမကျသေးဘဲ အစား အစာများကို ဒေသခံအာဏာပိုင် များက ထောက်ပံ့ပေးမှု မရှိသောကြောင့် ရေဘေး ဒုက္ခသည်များမှာ မိမိဘာသာ ရှာဖွေရပ်တည်နေရသည်ဟု ဆိုသည်။

“ကျမတို့က ယရကတွေကို အကူအညီတောင်းကြည့်တာ မရဘူး။ တချို့တွေ ဆန်ပြုတ်ပဲ သောက်နေရတယ်” ဟု ပြွန်တံဆာမြို့ခံတဦးဖြစ်သူ ဒေါ်ချစ်သားက ပြောပြသည်။

ရွှေကျင်နှင့်မဒေါက် မြို့နယ်များတွင် သွားလာရေးအတွက် လှေများကိုသာ အသုံးပြု နေရသေးသည်ဟု ဒေသခံများက ပြောဆိုသည်။

ဧရာဝတီတိုင်း ညောင်တုန်းမြို့နယ် အရှေ့ဘက်ကမ်း ဗိုလ်မြတ်ထွန်း တံတားအနီးတွင်လည်း မိုးသည်း ထန်ပြီး ဧရာဝတီ မြစ်ရေလျှံသဖြင့် ဂန်ချောင်းကျေးရွာရှိ ဂန်ချောင်း ရေကာတာ ကျိုးပျက်နိုင်သည့် အလားအလာ ရှိနေရာ ထိုဒေသတဝိုက်ရှိ ငါး၊ ပုစွန်ကန် များကို အပူတပြင်း ဖော်နေပြီ ဖြစ်ကြောင်း မြန်မာနိုင်ငံ ငါးလုပ်ငန်း အဖွဲ့ချုပ်နှင့် နီးစပ်သူတဦးထံမှ ကြားသိ ရသည်။

“ညောင်တုန်း၊ မအူပင်နဲ့ တွံတေး တဝိုက်က ငါးကန်၊ ပုစွန်ကန်တွေ အမြန်ဖော်ပြီး ဈေးကွက်ထဲပို့နေတယ်လို့ ပြောတယ်” ဟု ၎င်းက ပြောပြသည်။

၎င်းရေကာတာ ကျိုးပျက်လျင် တွံတေး အပါအဝင် နာဂစ်ဆိုင်ကလုန်း မုန်တိုင်းသင့် ဒေသတချို့နှင့် ညောင်တုန်းမြို့နယ် အပိုင် ရွာတချို့အန္တရာယ် ရှိနိုင်သည်ဟု သိရသည်။
“ဧရာဝတီတိုင်း၊ တိုင်းမှူးကိုယ်တိုင်ဆင်းကြည့်တယ်။ သဲအိတ်တွေနဲ့ ကာကွယ်ရေးတွေ လုပ်နေတယ်။ ငါး၊ ပုစွန် စီးပွားရေး သမားတွေကတော့ သူတို့ကန်တွေ အပါမခံနိုင်ဘူးဆိုပြီး အမြန်ဖော်ရောင်းနေတာပဲ။ ဒေသခံတွေကိုတော့ ကာကွယ်ရေး အတွက် နှိုးဆော်တာတွေ မလုပ်သေးဘူး” ဟု သူကဆက်ပြောသည်။