ဖမ်းဆီးထားသူများ လွတ်ပေးရန် ရခိုင်အဖွဲ့များ တောင်းဆို

18-08-2008
ချင်းမိုင်။ ။ ရခိုင်ပြည်နယ် တောင်ကုတ်မြို့မှ ဆန္ဒပြသူ လူငယ် (၅)ဦးအား ဖမ်းဆီး ထောင်ချလိုက်သည့်အတွက် ရခိုင် အဖွဲ့အစည်းများက ပြစ်တင်ရှုတ်ချလိုက်ပြီး အမြန်ဆုံးလွှတ်ပေးရန် တောင်းဆိုလိုက်သည်။

သြဂုတ်လ ၈ရက်နေ့က ဆန္ဒပြ ငြိမ်းချမ်းစွာ လမ်းလျှောက် ချီတက်၍ မနီနီမေမြင့်၊ ကိုမောင်မောင်သက်၊ ကိုချစ်မောင်မောင်၊ ကိုမိုးနိုင်စိုးနှင့် ကိုသန်းလွင်တို့ကို စစ်အစိုးရက ထောင်ဒဏ် (၂) နှစ် ခွဲ ချမှတ်လိုက်ခြင်းအတွက် “မတရားတဲ့ လုပ်ရပ်” ဟု ဘင်္ဂလားဒေ့ရှ် အခြေစိုက် ရခိုင်အမျိုးသမီး အစည်းအရုံးက ပြောသည်။

“ဒီလို စီတန်း လမ်းလျှောက်ပြီးတော့ ဆန္ဒပြတယ် ဆိုတာက နိုင်ငံတော်ကို ဆူပူအောင် လုပ်တာမှ မဟုတ်တာ၊ သူတို့လုပ်တာက အေးအေးချမ်းချမ်းပဲ လမ်းလျှောက်တာ ဒါကို နအဖက အပြစ်ယူပြီးတော့ သူတို့ကို ဖမ်းဆီး တရားဆွဲတယ်၊ အဲဒီလို တဘက်သတ် စီရင်ချက်ချတယ် ဆိုတာဟာ မတရားတဲ့ လုပ်ရပ်ဖြစ်တယ်၊ ဒါကြောင့် မနီနီမေမြင့် အပါအဝင် ဖမ်းဆီးခံထားသူများကို အမြန်ဆုံး လွှတ်ပေးဖို့ တောင်းဆိုတယ်” ဟု ရခိုင်အမျိုးသမီး အစည်းအရုံးမှ ဥက္ကဌ မစောမြရာဇာလင်းက ပြောသည်။

လမ်းလျှောက် ဆန္ဒပြသူများသည် ဥပဒေနှင့် ဆန့်ကျင်သည့် လူစုလူဝေးတွင် ပါဝင်မှုနှင့် နိုင်ငံတော် ဆူပူအောင် လှုံ့ဆော်မှုတို့ဖြင့် အရေးယူခဲ့ခြင်း ဖြစ်သည်ဟု သံတွဲခရိုင် တရားရုံးက စီရင်ချက် ချခဲ့သည်။

အလားတူပင် ၁၉၉ဝခုနှစ် ရွေးကောက်ပွဲတွင် မဲဆန္ဒနယ်မြေ (၁၁)နေရာ အနိုင်ရခဲ့သည့် ရခိုင်ပြည်နယ် အမျိုးသား ဒီမိုကရေစီ အဖွဲ့ချုပ်ကလည်း နိုင်ငံရေး ပြေလည်မှုအတွက် စစ်အစိုးရ အနေဖြင့် တွေ့ဆုံ ဆွေးနွေးရေး လုပ်ပါဟု ထပ်မံ ပြောကြားလိုက်ပြန်သည်။

“ဒီလို တဘက်သတ် သူတို့ လုပ်ချင်တာ လုပ်နေပေမဲ့ နိုင်ငံရေး ပြေလည်ဖို့အတွက် လုပ်နေတာ မဟုတ်ဘူး၊ နိုင်ငံရေး ပြေလည်ဖို့အတွက် တွေ့ဆုံဆွေးနွေးရေး လုပ်ရမယ်၊ မလုပ်ရင် ထောင်ထဲမှာ လူတွေ များလာမယ်။ ပြည်သူတွေ ဒုက္ခများလာမယ်၊ အမျိုးသားပြန်လည် သင့်မြတ်ရေးအတွက် တွေ့ဆုံဆွေးနွေးကို မလွဲမသွေ လုပ်ဆောင်ရမယ်။ ဒီလမ်းဘဲ ငြိမ်းချမ်းတဲ့ အသွင်ကူးပြောင်းလာရေး တည်ဆောက်လို့ ရနိုင်မယ်” ဟု ရခိုင်အမျိုးသား ဒီမိုကရေစီ အဖွဲ့ချုပ် ပြည်နယ် စည်းရုံးရေးအဖွဲ့မှ တွဲဘက်အတွင်းရေးမှူး ဦးသိန်းလှိုင်က ပြောသည်။

နိုင်ငံရေးလှုပ်ရှားမှု အားကောင်းရာ ရခိုင်ပြည်နယ်အတွင်း အဖမ်းဆီးခံရမှုများလည်း ဆက်တိုက် ဖြစ်ပွားနေရာ သြဂုတ်လ ၁၂ ရက်နေ့တွင် ရခိုင်ပြည်နယ် အမျိုးသား ဒီမိုကရေစီ အဖွဲ့ချုပ် လွတ်တော် ကိုယ်စားလှယ် ဦးညီပုလေး အဖမ်းခံခဲ့ရပြီး သြဂုတ်လ ၁၅ရက်နေ့ တကိုယ်တော် ဆန္ဒပြခဲ့သူ ကိုမြင့်သိန်းချေနှင့် ၄င်း၏ဇနီး မဌေးဌေးတို့ ထပ်မံ အဖမ်းခံခဲ့ရသည်။