ဖြူဖြူသင်း ပြန်လာပြီ

15-06-2008

အေအိုင်ဒီအက်စ် ဝေဒနာသည်များကို ကူညီစောင့်ရှောက်သူအဖြစ် ထင်ရှားသည့် မဖြူဖြူသင်းသည် တစ်နှစ်နီးပါးတိမ်းရှောင်နေရာမှ ယခုအခါ ရန်ကုန်မြို့တွင် ပြန်လည်ထွက်ပေါ်လာပြီး ပုံမှန်လုပ်ငန်းများ ပြန်လည် လုပ်ကိုင်လျက်ရှိသည်။

အမျိုးသားဒီမိုကရေစီအဖွဲ့ချုပ်၊ လူငယ်အဖွဲ့ခေါင်းဆောင်တစ်ဦးဖြစ်သူ မဖြူဖြူသင်းသည် သူ့အား စောင့်ကြည့်ရန် တာဝန်ကျသည့် ဒေသခံ အာဏာပိုင်များထံ သွားရောက်တွေ့ဆုံခဲ့ကြောင်း၊ ၎င်းတို့က သူ့အား တိမ်းရှောင်ပုန်းအောင်းနေရန် မလိုအပ်ကြောင်း ပြောကြားခဲ့သည်ဟု သိရသည်။

ပြီးခဲ့သည့်နှစ် သြဂုတ်လအတွင်း နိုင်ငံရေးလှုပ်ရှားမှုများတွင် ပါဝင်သော ထင်ရှားသည့် လူငယ်များ ဖမ်းဆီး ထိန်းသိမ်းခံခဲ့ရချိန်မှစပြီး မဖြူဖြူသင်းသည် လူမြင်ကွင်းမှ ပျောက်ကွယ်သွားခြင်းဖြစ်သည်။

မဖြူဖြူသင်းသည် လုပ်ဖော်ကိုင်ဘက်များနှင့်အတူ အေအိုင်ဒီအက်စ်ရောဂါ ကာကွယ်တိုက်ဖျက်ရေး၊ ပညာပေးရေးလုပ်ငန်းများကို ၂၀၀၂ ခုနှစ်မှစပြီး တစိုက်မတ်မတ် လုပ်ကိုင်နေသူ ဖြစ်သည်။ ၈ နှစ်အတွင်း လူနာပေါင်း ၁၈၀၀ ကျော်ကို ကူညီခဲ့သည်ဟု သိရသည်။

တိမ်းရှောင်နေချိန်အတွင်း သူ၏လူနာအချို့တည်းခိုနေထိုင်သည့် ရန်ကုန်မှ မဂ္ဂင်ကျောင်းတိုက် ချိတ်ပိတ်ခံခဲ့ရပြီး၊ ဖခင်ဖြစ်သူလည်း ရုတ်တရက် ကွယ်လွန်ခဲ့သည်။

လွန်ခဲ့သည့်မတ်လက မဖြူဖြူသင်းသည် Czech သမ္မတနိုင်ငံ၊ People in Need ဖောင်ဒေးရှင်းက ပေးအပ်သော Homo Homini ဆုကို ချီးမြှင့်ခံရသည်။ မြန်မာပြည်နိုင်ငံရေး လှုပ်ရှားမှုထဲမှ ထင်ရှားသည့် အမျိုးသမီးများဖြစ်ကြသည့် မစုစုနွေး၊ မနီလာသိန်းတို့နှင့်အတူ ပူးတွဲချီးမြှင့်ခံရခြင်းဖြစ်သည်။ ထိုဆုသည် ဒီမိုကရေစီနှင့် လူ့အခွင့်အရေးလုပ်ငန်းများတွင် စွမ်းစွမ်းတမံဆောင်ရွက်သူများ၊ နိုင်ငံရေး ပဋိပက္ခများတွင် အကြမ်းမဖက်သည့်နည်းဖြင့် လှုပ်ရှားသူများကို ပေးအပ်သည့်ဆုဖြစ်သည်။